Ұлттық құндылық ұлықталған Наурыз думаны "Білім айнасы"
Home » Жаңалықтар » Ұлттық құндылық ұлықталған Наурыз думаны
Ұлттық құндылық ұлықталған Наурыз думаны
Жаңалықтар, Мақалалар0 99 қаралған 2026-04-27 Алматы қаласы, Медеу ауданы №141 бөбекжай-балабақшасында Ұлыстың ұлы күні — Наурыз мейрамы кең көлемде аталып өтті. Табиғат жаңарып, тіршілік түлейтін бұл мереке балабақша ұжымы үшін де ерекше мәнге ие. Ұлттық салт-дәстүр мен әдет-ғұрыпты дәріптеуді мақсат еткен шара жоғары деңгейде ұйымдастырылып, бүлдіршіндер мен ата-аналарға көтеріңкі көңіл күй сыйлады. Мерекелік іс-шара балабақша меңгерушісі Курмамбаева Орынбасар Мекибаевнаның құттықтау сөзімен ашылды. Өз сөзінде меңгеруші Наурыз мейрамының мән-маңызына тоқталып, бұл күннің бірлік пен татулықтың, жаңару мен жақсылықтың бастауы екенін атап өтті. Сондай-ақ, жас ұрпақтың бойына ұлттық құндылықтарды сіңіру — басты міндеттердің бірі екенін ерекше жеткізді. Шара барысында балабақша ауласы ұлттық нақышта безендіріліп, қазақы киіз үй тігіліп, мерекенің сәні кірді. Балалар ұлттық киім киіп, өз өнерлерін ортаға салды. Әсем әндер шырқалып, мың бұралған билер орындалды. Сонымен қатар, тәрбиеленушілердің қатысуымен сахналық көріністер қойылып, Наурыздың мәнін ашатын тәрбиелік мазмұндағы қойылымдар көрермендердің ыстық ықыласына бөленді. Мерекенің басты кейіпкерлерінің бірі — Қыдыр ата арнайы келіп, балаларға ақ батасын берді. Бұл сәт бүлдіршіндерге ерекше әсер сыйлап, олардың мерекеге деген қызығушылығын арттыра түсті. Қыдыр атаның келуі арқылы ұлттық таным мен сенім көрініс тауып, дәстүр сабақтастығы айқын байқалды. Іс-шара аясында қазақ халқының ұлттық ойындары да кеңінен насихатталды. Балалар «Арқан тарту», «Асық ату», «Теңге ілу» секілді ойындарға белсене қатысып, ептілік пен шапшаңдықтарын көрсетті. Бұл ойындар арқылы балалардың тек қимыл-қозғалысы ғана емес, ұлттық ойындарға деген қызығушылығы да артты. Ерекше атап өтерлігі, мерекеге ата-аналар да белсене қатысып, балаларының қуанышына ортақтасты. Олар үшін арнайы ұйымдастырылған спорттық ойындарда ата-аналар өзара бақ сынасып, ұйымшылдық пен белсенділіктің үлгісін көрсетті. Мұндай шаралар ата-ана мен балабақша арасындағы байланысты нығайтып, өзара сенімді арттыра түсетіні сөзсіз. Сонымен қатар, қонақтар да шақырылып, олар мерекелік бағдарламаның куәсі болды. Қонақтар балабақша ұжымының еңбегіне жоғары баға беріп, бүлдіршіндердің өнеріне тәнті болды. Наурыз мейрамы — тек көңіл көтеру ғана емес, ұлттың рухани байлығын ұрпақ бойына сіңірудің бірден-бір жолы. №141 бөбекжай-балабақшасында өткен бұл шара — соның айқын дәлелі. Ұйымдастырушылар ұлттық құндылықтарды дәріптеуде үлкен жауапкершілік танытып, мазмұнды әрі тағылымды мереке сыйлай білді. Осындай игі іс-шаралар арқылы жас ұрпақтың бойына ұлттық тәрбие дарытып, салт-дәстүрге деген құрмет қалыптасатыны анық. Көктемнің жарқын мерекесі балабақша қабырғасында шаттық пен қуанышқа толы ерекше күн ретінде есте қалды. Ақерке Амангелдіқызы Алматы қаласы BILIM AINASY
